Reagerer på turist-dusjar i Auschwitz
Israelske turistar er sjokkerte etter at det er sett opp dusjar for turistane ved inngangen til konsentrasjonsleiren i Polen. – Som eit slag i magen, seier ein av turistane.
31/08/2015
På grunn av sommarvarme i Polen er det sett opp ei rekkje med dusjar der dei besøkande kan kjøle seg ned. Det fører til harme blant fleire av turistane, skriv nettstaden Ynetnews.com.
Nazistane brukte noko som kunne likne dusjrom til å drepe millionar av jødiske fangar under andre verdskrig, ved å sleppe ned den dødelege gassen Zyklon B.
– Kva er verre enn å ta ein selfie i Auschwitz? Dette! Det skriv USA Today.
– Det minna meg om gasskammera
– Så snart eg gjekk av bussen kom eg rett inn i området der dusjane står, fortel turisten Meyer Bolka til ynetnews. – Eg var i sjokk. Det var eit slag i magen, fortel ho.
Bolka seier at ho deretter gjekk til resepsjonsområdet og spurte kvifor dusjane var plassert der.
– Ho sa det var ein varm dag. Eg sa, med all respekt så minner det meg om gasskammera. Kvinna i resepsjonen beklaga veldig, fortel Bolka.
Nazistane i Auschwitz tok livet av meir enn ein million jødar, sigøynarar og sovjetiske krigsfangar mellom 1942 og 1945. I år var det 70 år sidan frigjeringa av fangane i leiren.
Vil unngå at turistar svimer av
Mange av dei yngre besøkande i Auschwitz denne dagen brukte dusjane til å kjøle seg ned. Turisten Meyer Bolka trur ikkje at dei tenkjer over den historiske samanhengen. Ho meiner at ein bør finne andre måtar å kjøle ned dei besøkande på.
– Eg trur at stader som dette må tenke over assosiasjonane slike ting kan føre til. Det var ikkje hyggeleg å sjå desse sprinklane, det gav meg deja vu, seier ho.
Museet skriv i eit innlegg på Facebook at dei sette opp sprinklaranlegget fordi det ikkje er lett å finne skugge i sommarvarmen utanfor museet.
– Vi må unngå at dei besøkande svimer av på grunn av dei veldig høge temperaturane. Dessutan såg ikkje dusjane i gasskammera ut som dei vi har sett opp, Zyklon B vart sleppt inn i kammera blant anna ved hjelp av hol i taket, skriv dei.
http://www.nrk.no/verden/reagerer-pa-tu ... 1.12528228
